Lansiad Cyfeiriadur Cynhyrchu Cymru yn creu cronfa ddata criw cenedlaethol canolog i Gymru gyfan

Mae Cynghrair Sgrin Cymru, mewn partneriaeth â Cymru Greadigol a gyda chefnogaeth cydweithiad ar draws y sector gan gynnwys Culture Connect Wales, wedi cyhoeddi lansiad Cyfeiriadur Cynhyrchu Cymru, sef cronfa ddata criwiau cenedlaethol canolog i Gymru.

Mae hwn yn gam mawr i ddiwydiant sgrin Cymru yn sefydlu un adnodd canolog, cynhwysfawr ar gyfer cynyrchiadau ffilm a theledu sy’n chwilio am griw medrus ledled y genedl, gan symleiddio mynediad a chryfhau cynnig Cymru i fuddsoddiad mewnol.

Bydd y Cyfeiriadur Cynhyrchu Cymru yn cael ei gyflwyno ar blatfform Cynghrair Sgrin Cymru, wedi’i reoli gan Gynghrair Sgrin Cymru ac wedi’i ariannu gan Lywodraeth Cymru drwy Cymru Greadigol. Bydd yn golygu un system unedig, gan ddileu dyblygu a chreu pwynt mynediad clir a hygyrch i weithwyr proffesiynol y diwydiant a chynyrchiadau.

Cynnig cryfach ac unedig i Gymru

Bydd Cyfeiriadur Cynhyrchu Cymru yn:

• Darparu un platfform canolog i griwiau gofrestru, arddangos eu sgiliau, a chysylltu â chyfleoedd

• Galluogi cwmnïau cynhyrchu i nodi talent brofiadol sydd wedi’i leoli yng Nghymru, yn effeithlon

• Cryfhau’r cynnig cynhyrchu yng Nghymru drwy symleiddio mynediad at wybodaeth am y gweithlu

• Cefnogi economi Cymru drwy hyrwyddo criwiau lleol a busnesau cadwyn gyflenwi

• Sicrhau bod swyddi gwag, galwadau allan a chyfleoedd yn cael eu rhannu’n eang ar draws y sector

Bydd y dull cydgysylltiedig hwn yn ei gwneud hi’n haws i weithwyr proffesiynol sefydledig a’r rhai sy’n ceisio ymuno â’r diwydiant ymgysylltu â chynyrchiadau sy’n ffilmio yng Nghymru.

Dywedodd y Gweinidog Creadigol, Jack Sargeant: “Mae gan Gymru ddiwydiant sgrin o’r radd flaenaf, a bydd y gronfa ddata criw cenedlaethol newydd hon yn ei gwneud hi hyd yn oed yn haws i gynyrchiadau ddod o hyd i’r dalent eithriadol yma a gweithio gyda hi. Bydd hefyd yn ei gwneud hi’n haws i’n talent gael mynediad at yr holl gyfleoedd gwych sydd ar gael yng Nghymru. Drwy ddod â phopeth at ei gilydd mewn un lle, rydym yn cefnogi’r sector sgrin yma ac yn anfon signal clir i’r diwydiant yn y DU a rhyngwladol bod Cymru ar agor, yn barod, ac wedi’i chyfarparu’n unigryw i gynnal ystod eang o gynyrchiadau. Dyma’r union fath o weithredu ymarferol, cydgysylltiedig a fydd yn helpu i dyfu ein sector sgrin, cefnogi swyddi medrus a chryfhau ein heconomi.”

Dywedodd Rheolwr Gyfarwyddwr, Cynghrair Sgrin Cymru, Allison Dowzell OBE: “Mae Cymru wedi meithrin enw da o’r radd flaenaf am gynhyrchu, ond mae ein twf parhaus yn dibynnu ar ba mor weladwy, hygyrch a chysylltiedig yw ein gweithlu. Mae Cyfeiriadur Cynhyrchu Cymru yn gam sylweddol ymlaen wrth ddod â’r sector ynghyd a chreu un porth dibynadwy ar gyfer criwiau a chynyrchiadau fel ei gilydd.

Drwy uno adnoddau presennol, rydym yn ei gwneud hi’n haws i gynyrchiadau ddod o hyd i dalent fedrus Gymreig, gan sicrhau bod gan ein gweithlu fynediad cliriach at gyfleoedd. Mae hyn yn ymwneud â chryfhau’r ecosystem gyfan, cefnogi gyrfaoedd, ysgogi buddsoddiad mewnol, ac atgyfnerthu Cymru fel cenedl gystadleuol, barod i gynhyrchu.”

Dywedodd Swyddog Negodiadau Cymru, BECTU, Carwyn Donovan: “Mae Bectu yn croesawu creu cronfa ddata criw sengl i Gymru, a fydd o’r diwedd yn rhoi’r gwelededd y mae ein gweithwyr llawrydd gwych yn ei haeddu.

“Am gyfnod rhy hir mae talent wedi’i rannu ar draws sawl system gan greu dryswch a dyblygu diangen. Bydd platfform unedig yn arddangos cryfder cymuned greadigol Cymru, ac edrychwn ymlaen at weithio’n agos gyda Chynghrair Sgrin Cymru a rhanddeiliaid eraill i’w wneud yn ased go iawn i weithwyr llawrydd.”

Ysgogi cydweithio ac arfer gorau

Mae creu cronfa ddata cenedlaethol sengl yn adlewyrchu cydweithio cryf ar draws sector sgrin Cymru ac ymrwymiad a rennir i wella hygyrchedd, gwelededd ac effeithlonrwydd.

Drwy alinio adnoddau presennol i un platfform, mae Cyfeiriadur Cynhyrchu Cymru yn cynrychioli model o arfer gorau, gan sicrhau bod gwybodaeth ar gael mewn un lle a chefnogi diwydiant mwy cydlynol ac effeithiol.

Y camau nesaf i’r criw

Anogir unrhyw griw sydd wedi cofrestru ar gronfeydd data presennol i sicrhau bod eu manylion wedi’u cynnwys ac yn gyfredol ar Gyfeiriadur Cynhyrchu Cymru er mwyn sicrhau’r gwelededd mwyaf posibl ar gyfer cyfleoedd sydd ar y gweill.

Mae rhagor o fanylion a gwybodaeth cofrestru ar gael drwy Gynghrair Sgrin Cymru.

Cefnogi amgylchedd cynhyrchu o’r radd flaenaf

Mae’r Cyfeiriadur Cynhyrchu Cymru yn ategu ecosystem cynhyrchu ehangach Cymru. Bydd Cronfa Ddata Lleoliadau Cymru Greadigol yn parhau i gael ei chyflwyno ar wahân gan Gymru Greadigol, yn cynnwys dros 3,000 o leoliadau ffilmio wedi’u gwirio a mwy na 50,000 o ddelweddau.

Gyda’i gilydd, mae’r gwasanaethau hyn yn cryfhau safle Cymru fel cenedl gystadleuol iawn, sy’n barod i gynhyrchu, gan gynnig gweithlu medrus a gweladwy a phortffolio lleoliadau cyfoethog a hygyrch i gefnogi cynhyrchu ffilm a theledu.

Diwedd

I gael mynediad at Gyfeiriadur Cynhyrchu Cymru a diweddaru neu ychwanegu eich manylion, ewch i: https://www.screenalliancewales.com/production-directory/  

Ynglŷn â Chynghrair Sgrin Cymru

Cynghrair Sgrin Cymru (CSC) yw’r sefydliad addysg a hyfforddiant mwyaf ar gyfer ffilm a theledu yng Nghymru, wedi’i leoli yn Wolf Studios Wales. Gan weithio mewn partneriaeth agos â darlledwyr, ffrydwyr a chwmnïau cynhyrchu mawr, mae CSC yn cysylltu hyfforddiant yn uniongyrchol ag anghenion y diwydiant, gan gefnogi ymgeiswyr newydd, uwchsgilio’r gweithlu presennol, a helpu cynyrchiadau i gael mynediad at griw medrus, parod i weithio. Drwy ei blatfform a’i raglenni, mae CSC yn darparu rhestrau criw wedi’u gwirio, hyfforddiant dan arweiniad y diwydiant, a llwybrau gyrfa sy’n cryfhau sector sgrin Cymru ac yn cefnogi ei dwf parhaus yn genedlaethol ac yn rhyngwladol.

Ynglŷn â Cymru Greadigol

Mae Cymru Greadigol yn asiantaeth datblygu economaidd sy’n gweithio i ysgogi twf a hyrwyddo llwyddiant ar draws diwydiannau creadigol ffyniannus Cymru. Fel rhan o Lywodraeth Cymru, mae cefnogi’r sector Sgrin (cynyrchiadau ffilm a theledu, gan gynnwys ôl-gynhyrchu a chynnwys animeiddiedig) yn rhan o’n gwaith.

Ers lansio yn 2020, mae Cymru Greadigol wedi bod yn cefnogi busnesau annibynnol o Gymru i ddatblygu cynnwys o ansawdd uchel, ac mae wedi denu buddsoddiad gan gwmnïau cynhyrchu a gwasanaethau ffrydio mwyaf nodedig y byd gan gynnwys HBO, Netflix ac Amazon, gan wneud Cymru yn gyrchfan o’r radd flaenaf ar gyfer ffilmio. 

Mae’r sector sgrin yn chwarae rhan bwysig yn economi Cymru ac mae’n gyflogwr allweddol. Mae data’r ymchwil diweddaraf yn y diwydiant (2024*) yn nodi bod cynyrchiadau ffilm a theledu wedi cyflawni trosiant o £568m yn 2024 ac mae’n gartref i 695 o gwmnïau sy’n creu cyfleoedd llawrydd a chyfleoedd hyfforddeion sylweddol i’n gweithlu. Mae nifer y cwmnïau sy’n gweithredu yng Nghymru wedi cynyddu bron i 20% ers 2019, gan adlewyrchu twf parhaus ar draws y sector hwn.  Mae Cymru Greadigol wedi buddsoddi mewn 81 o brosiectau drwy Gyllid Cynhyrchu yn unig, gan gynhyrchu bron i hanner biliwn o bunnoedd mewn enillion economaidd i’r genedl, ac mae’r symiau hyn yn parhau i dyfu.

Yn ogystal â’r cymorth ariannol a chyngor pwrpasol yr ydym yn eu cynnig, mae gan Gymru leoliadau syfrdanol, amrywiol, yn ogystal â chyfleusterau stiwdio o’r radd flaenaf, gwasanaethau ôl-gynhyrchu a chriw talentog.  Ymhlith y cynyrchiadau nodedig a wnaed yng Nghymru mae House of the Dragon (HBO), Industry (BBC|HBO), His Dark Materials (BBC|HBO), Mr Burton (Icon) a H is for Hawk (Lionsgate).

Rydym yn angerddol am sicrhau llwyddiant hirdymor y diwydiant Ffilm a Theledu, ac yn gweithio’n agos gyda chynyrchiadau i greu prentisiaethau, lleoliadau gwaith a chyfleoedd uwchsgilio i bobl ar bob cam o’u gyrfaoedd, wrth hyrwyddo arferion gorau o ran llesiant, cynaliadwyedd a chynhwysiant. Mae gan y sector sgrin yng Nghymru gyfran uwch o bobl ag anableddau yn ei weithlu na chyfartaledd Cymru a’r DU.

I ddarganfod mwy am Gyllid Cynhyrchu a’n gwasanaeth Sgrin Cymru, ewch i cymrugreadigol.cymru.

Dilynwch ni ar Instagram a LinkedIn.

Gwyliwch ein ffilm arddangos yma.

*Ffynhonnell data: Ystadegau’r Economi a Marchnad Lafur Creadigol Cymru 2024